السبت، ٣١ مارس ٢٠٠٧

إي نعم شباب كويتي



كلمة وايد نسمعها .. الشاب الكويتي ما يتحمل المسئولية .. الشاب الكويتي ما يحب الشغل .. الشاب الكويتي يبي الربادة .. الشاب الكويتي ما يصلح .. الشاب الكويتي صاحب أكل و بلعة و قلة صنعة .. و يا كثر ما سمعتوا !!

اتفقت أنا و زميلي المصور يوسف الذويخ ان نروح سوق شرق صباح الخميس الساعة 9:00 وبعد ما وصلنا بدينا تصوير مع بعض .. افترينا حول سوق شرق نصور .. و ساعات نفترق شوي علشان كل واحد ياخذ راحته بزاوية تصوير معينة .. رحنا صوب الأسكلة .. صورنا الحداقة و صورنا تحت الجسر !! و نزلنا على الصخر الحامي من الموج نصور من تحت .. و المهم انا استانسنا و فعلا غيرنا جو ..






صارت الساعة 10:30 تقريبا .. طقنا اليوع .. دشينا السوق و قلنا بنتريق بستاربكس دبنهامز .. قهوة و عصير و كلب ساندويتش و طحنا له سوالف و تناقشنا بالمكان التالي اللي الحين بنصور فيه .. رست المناقشة على تصوير اللنجات اللي صوب سوق السمج ..



لما و صلنا شفنا هناك لوووية .. عمال في كل مكان .. و من مختلف الجنسيات .. هنود و بنغال و مصاروة و وايد منهم صعايدة .. الكل يشتغل على اللنجات و صيد السمج .. دشينا بين هاللوية و طلعنا كاميراتنا .. طبعا أشكالنا شاذة بين هالجموع .. بنطرونات جينز و تي شيرتات و نظارات شمسية و جنطة الكاميرا على الظهر و الكاميرا باليد !! ما بقى أحد ما يطالعنا !!

حتى القطوة مستغربة !!



بس هم قلنا بندش نصور .. اشتغلنا عليهم تصوير .. اللي يدخن و اللي يلعب بشعره و اللي منسدح و اللي ضايق خلقه و اللي سرحان .. ما خلينا أحد بحاله ..

وجوه من الحفل










.. طبعا في هذي اللوية افترقنا .. عقبها فقدت صاحبي .. أدوره وينه !!؟ ما حصلته !! أدق عليه ما يرد !! شوي ولا اللي يناديني من بعيد . خااااااالد الحق بسرعة تعال .. و لا الحبيب راكب لنج من لنجات الصيد و قاعد يصور ..



قلت والله خوش فكرة .. لما وصلت ولا العمال في اللنج قاعدين يغرفون سمج من الخن - الغرفة اللي في أسفل اللنج و عادة تكون للتبريد و فيها ثلج أو تخزين أغراض - و يغرفون مو 100 ولا 200 !! والله بدون مبالغة يمكن أكثر من 1000 سمجة !! صارلنا ساعة و نص تقريبا و احنا نصورهم بالشمس و لا خلصت كمية السمج اللي في الخن .. أنواع و أشكال .. ما أبالغ .. بس يمكن هاللنج بروحه يمول نصف حاجة السوق !!
طبعا مو زين تشوف شنو السمج و شكثره !! هوامير و نقارير و بواليل و حمام و جنعد و شعوم و و و عد و خربط ..









استغربت من كلمة واحد من العمال يوم شافنا نحوس و ياهم و نصور بينهم و يحوشنا طشار منهم و ريحة الزفرة .. سألنا: انتوا كويتيين !؟
هني بيت القصيد و الشي اللي خلاني أكتب هذا البوست و أحط العنوان - إي نعم شباب كويتي - و نقولها بثقة تامة .. و ردينا عليه إي نعم كويتيين ..
أنا أدري ليش سألنا .. لأنه مو متعود يشوف شباب كويتي يحوس في الشمس و بين هاللوية و الزفرة و ماسك كاميرا و يصور .. الكل يسألنا انتوا تبع جريدة !؟ صورنا متى بتنزل !؟ و في أي جريدة !؟
ردنا عليهم كان: احنا مو تبع أحد و لا نشتغل عند أحد و يايين نشبع هواية في أنفسنا و نستمتع و نستفيد و نخوض تجربة يديدة ..

من هنا أقول .. و نفتخر

إي نعم شباب كويتي .. لما يكون قادر على إعادة الصورة المشوهة عنه في كثير من أذهان الناس بعمله و جده و اجتهاده و إخلاصه و تفانيه في عمله.

إي نعم شباب كويتي .. لما يعلن محاربة البطالة - إحصائيا ماكو بطالة لكن حقيقة فيه بطالة في الدوامات - و مضيعة الوقت و الربادة و يشوفله شغله تنفعه و تنفع ديرته.

إي نعم شباب كويتي .. لما يحط إيده في مختلف الأنشطة و يشارك لو متطوع في لجنة أو هيئة أو نادي أو جمعية و الهدف اكتساب خبرة و صقل مهارات و احتكاك بأشخاص جدد و معرفة التعامل معاهم.

إي نعم شباب كويتي .. لما يساهم في رفع مستوى التنمية في ديرته و يشوف لها حلول جذرية لا ترقيعية لخدمة ديرته و يترك التحلطم و التشاؤم من الأوضاع الحالية في الديرة و يبادر في الإصلاح في جميع المجالات سواء سياسية أو إقتصادية أو إجتماعية و غيرها.

إي نعم شباب كويتي .. لما يشوف الفساد و رموزه و ما يسكت عن تجاوزاتهم و يشارك في فضحهم و يساهم في تطهير جميع مؤسسات الدولة من سمومهم.

إي نعم شباب كويتي .. لما يشوف راية للإصلاح قد رفعت و يسارع بدون تردد في المساعدة برفع الراية و شد أزر الإصلاحيين المخلصين في هذا البلد بغض النظر عن توجهاتهم و فكرهم و إنتماءاتهم الحزبية أو الحركية و نبذ الخلافات بهدف دفع عجلة التنمية في ديرتنا


بوركت خطاكم يا شباب الكويت

هناك ١٨ تعليقًا:

Tekana يقول...

يعطيكم العافيه :)

Mamloo7a Q8ia يقول...

والله والتعم في الشباب الكويتي الطموح الجاد
الله يعطيكم الف صحة وعافية

QiYaDiYa يقول...

شباب الكويت فيهم الخير ..
بس يحتاجون توجيه لطاقاتهم .. و مكان يبرزون في ابداعاتهم ..
و انهم يعرفون حق نفسهم عدل ..
و يسخرون طاقاتهم لخ\مة دينهم و وطنهم ..


والله يكثر من امثالكم =)

Q8links يقول...

الحقيقة المعروف عن الشباب الكويتي في السابق انه ربادي وما يحب الشغل

لكن ولله الحمد برزت نماذج في السنين الأخيرة وخصوصا في القطاع الخاص أبطلت تلك المقولة وأثبتت بالدليل القاطع قدرة الشباب الكويتي بعون الله على الإنجاز والتفوق

bsma يقول...

شعرت بالحماس وأنا أقرا العبارات الأخيرة في تعريف الشباب الكويتي الحقيقي

الديرة فيها خير وايد دام امثالكم شبابها

عساكم على القوة :)

غير معرف يقول...
أزال المؤلف هذا التعليق.
ReLaaaX يقول...

حسيت بفخـــر


و


زيادة بعدد جيل الصحوة




عسى الله يبارك فيكم

Nora يقول...

و النعم والله
:D

احس فيني صفقة قووووووووووووية

!

الشباب الكويتي طول عمره بارز و نشيط و فعال و رااائد على مستوى الخليج و احيانا العرب


اللي اشووفه .. مشكلة وقتنا

كل الاضواااء على الفئات الشاذة
يتنا فترة حسينا كل عيال الديرة مدمنين @@

فترة ثانية .. لا كلهم جنس ثالث
@@

الفكرة .. طريقة معالجة النماذج التعبانة .. مو صحيحة

الأصح .. تضخيم الشباب الطيب و اظهار انجازاته و نشاطاته .. يعني كل الاضواء تكون عليه

بهالشي .. يتحقق هدفين
قدوة للشباب الغير منتج من نفس عمره و ظروفه و كل شي

و تشجيع الشباب الصالح و اظهار الجانب الزين بالمجتمع


سوري تكلمت وايد .. بس هالموضوع فبالي من زمـــــــان و حدي اتضايق لما يطعن احد بشبابنا لاني شايفة النماذج الصح الحمدالله .. و قررت اني ابدا ما اعمم

كلمة شباب = بنات و اولاد
--
شكراااااااااااااا
:D

support'n u till the endless end ..

Unknown يقول...

إبداع يا بووليد... الصور جميلة وتثبت بأن من التقطها شاب موهوب ومثابر... والأجمل من ذلك أنه كويتي :)


أخوك بوأحمد - واشنطن

Kuw_Son يقول...

Tekana & mamloo7a q8ia

الله يعافيكم

qiyadiya

أجمعين و بارك الله فيج ختي

Q8Links

إضافة متميزة :)

farqad

الله يقويج

relaaax

و يبارك فيج أختي الكريمة

a7la eng

ماعليج زود .. و الصفقة وصل صداها لي الخيران .. شكرا على هذه التحية

abdulla

هلا فيك أخوي بو أحمد .. مشاركتك ترفع من معنوياتي .. الله يعطيك العافية :)

Unknown يقول...

اللى عنده هواية ما ينقال عنه ما يتحمل مسؤولية
موفقين شباب ويعطيكم العافية

اخوكم مشارى

Breeze يقول...

مبروك الصفحة الجديدة :)

و يعطيكم ألف ألف خير .. والله عشت الجو معاكم من خلال الصور .. يزاكم الله خير ..

جان زين أقدر أصور و أدش بكاميرتي كل مكان .. أنا إن جابلت البحر و قعدت أجكجك خزوني و إقعدوا يطالعوني نظرة إستغراب !! وااااااي أوووف !!

خلوا الواحد بحــــااالــــــه !!!

--

المهم .. عليكم بالعافية .. و صج إستمتعت بالموضوع .. :)

قواك الله :)

Kuw_Son يقول...

أخوي مشاري .. وجودك دعم :)

الله يقويك

breeze

الله يقويج .. و دام مو قاعدة تسوين شي غلط .. سوي اللي يريحج

غير معرف يقول...

اي والله والنعم في الشباب الكويتي

عمري ما شفت مثله شباب نشيط

دومي اظرب فيهم المثل عندنا
احنا اكسل بوايد
+ مايشتغلون خير شر
+ وماكو وطنيه !!

الحمدالله على كل حال

الى الان انتو افضل
ودوم الي يحب الافضل شوي يتذمر
عشان يتم على القمه ^_^

الله يحفظكم يا شبابنا = ")

Amna يقول...

مـاشاءالله

كفو والله بالشباب الكويتي " بنات وشباب"

و الحمدلله الحين في طاقات شبابية قاعده تظهر بكل مكان وكل المجالات

بس محتاجين دعم دعم دعم وتشجيييع

ويقدرون يعطون ويعطون ويعطون ان شااءالله

وصج هذا اللي أشوفه
فيهم طاقات كبيرة بحاجه لتوجيه

----
الموضوع رااائع و مغزاه حيل مشجع

أعجبني الموضوع جدا

جزاك الله خير وللامام

غير معرف يقول...

ya shabab...entaw keltooha bnafuskum....al kel met3awed 3ala ena yshof shabab lekuwait bel lail bas...ow bas yalllah yghazel we "ygez" bel malls.

the hope is in u guys....ghayraw nathrat al nas 3al shab elkuwaiti

ow allah karim :)

SHAHAD يقول...

الصور خياال
حدي حبيتهم
والنعم فيكم شباب الكويت
ويطلع منكم أكثر من ابدااع
بس صدقني شبابنا يحتاجون فرصة مو اكثر
يكتشفون فيها نفسهم وقدراتهم وابداعاتهم
أحسنت أخوي
وبارك الله فيك
وكثر الله من أمثالك

Kuw_Son يقول...

Fatma Qatar

ِشكرا لك أختي الفاضلة .. لديكم من الشباب الخير ما يكفي إن شاء الله و فيكم البركة

b9mah

نعم كلامج صحيح .. الشباب الكويتي فيهم طاقات كبيرة .. بس محتاجين من يوجه هذي الطاقات ..

شكرا لك

shahad

الله يبارك فيج و يجزاج خير .. مشاركتج طيبة و حياج الله