الاثنين، 9 أبريل 2007

Friendly Work Environment

جاءتني فكرة هذا الموضوع بعد ما شاهدت مقطع فيديو



width="425">حيث أجرت مجلة فورتيون الشهيرة دراسة خلصت إلى قائمة بأفضل 100 شركة للعمل بها في الولايات المتحدة الأمريكية و على رأسها



See the link here


حرصت شركة جووجل كل الحرص على توفير أقصى سبل الراحة لموظفيها .. و أثبتت للعالم أجمع أهمية العنصر البشري كأهم مورد و أهم عنصر تعتمد عليه الشركة في نجاحها الملحوظ ..

الخدمات المقدمة من جووجل لموظفيها ... مجانا

1- مطاعم مجانية و عددها 11 مطعم لخدمة الموظفين
2- نادي صحي
3- صالون
4- خدمة غسيل السيارات و انت تشتغل
5- صالة ألعاب جماعية و ألعاب فيديو
6- حمامات سباحة
7- ملعب كرة طائرة
8- مساج
9- مصبغة
10- عيادة

- إذا تبي تشتري سيارة .. يشجعون الموظف يشتري سيارة تعمل على طاقة بديلة بمنحه 5000 دولار
- تبي تداوم بملابس النوم ولا البجاما .. الساعة المباركة و حياك الله
- ماكو ملابس معينة للدوام .. إلبس اللي تبي .. و تعال متى ما بغيت بس ورنا إنجاز في اليوم اللي تداوم فيه
- تقدر تييب معاك حيوانك المدلل - تكرم - بشرط ان الموظف اللي معاك ما عنده حساسية من الحيوانات و بشرط انك ما تسبب إزعاج و تخرب بيئة العمل !

يا ترى شنو تستفيد الشركة في المقابل !!؟

موظفين مخلصين للشركة و بقدرة عالية على الانتاجية !!

هذه أهم العوامل في نظري لنجاح أي شركة و استمراريتها في سوق العمل .. و مو أي سوق عمل !! هذا مجال تكنولوجيا المعلومات يعني المنافسة فيه ضارية جدا !! و من الصعب جدا الحفاظ على مركزك بين الشركات المنافسة !!

و تصوروا !! من كثر حبهم للشركة .. صارت الشركة مثل بيتهم و أكثر .. حتى بالليل يشتغلون ! بالله وين بيلاقي أحسن من جذي مطاعم و صالونات و نادي صحي و كل ما يتمناه الفرد من وسائل الترفيه موجودة !! شحقة يرد بيتهم !!؟

تصور معي أن الشركة تتلقى طلبات توظيف تصل إلى 3000 طلب يوميا !! بمعنى أنها تتلقى مليون طلب توظيف في السنة !!!!

لك أن تتخيل عزيزي القارئ هذا الكم الهائل من الخدمات المجانية لموظفي جووجل .. و تتحسر على وضعنا المزري !!

كأني أراك أيها القارئ و أنت تطق يد بيد و تقول إييييييه هذا الدوام ولا بلاش :)

أتمنى أشوف في وزارة من الوزارات خدمة وحدة من هذه الخدمات !! والله حتى لو بمقابل سعر رمزي زهيد بس المهم تقديرا للموظف و إكراما له .. طبعا أقصد الموظف اللي يداوم صج !!

نبي ناس تحب عملها و تخلص أولا و أخيرا نيتها في العمل .. إن هذا العمل كله يعود بفائدة على ديرتي و على نفسي و أهلي و عيالي
هم لا تدفعهم نوايا حسنة و طلب أجر من الله .. بس احنا كمسلمين خل يكون فينا دافع الذاتية و تربية النفس على الإتقان و التفاني في العمل ..

نحن لدينا قول رسولنا الحبيب صلى الله عليه وسلم:

إن الله يحب إذا عمل أحدكم عملا أن يتقنه



أدري في ناس راح تقول يا عمي روح زييييين .. انت وين عايش !؟ هذي مثالية وايد !

أنا ما ألوم الكثير من الناس المضطهدين وظيفيا ظلما و زورا و بهتانا .. شلون راح يخلصون في عملهم و يحبون مكان عملهم دام اللي فوقهم و اللي معاهم يحفرون لهم !؟

تبي نصيحتي .. يا تغير دوامك أو تصبر .. و يقولك شنو اللي حدك على المر !؟ قال اللي أمر منه !


وعسى الله يرزقنا

هناك 10 تعليقات:

Q8links يقول...

بيئة العمل المحببة موجودة في بعض شركات القطاع الخاص هنا في الكويت

لا أدري ما هي مزاياهم لكن تجد الموظف في بعض الشركات يداوم إلى ساعة متأخرة من الليل فقط ليحقق إنجاز ويرى اسم الشركة يرتفع وكذلك اسمه هو-الموظف- في تصريح في الصحف مثلا

كذلك الرواتب في القطاع الخاص غير محكومة بالسلم الحكومي الجامد والدرجات، بل تجدهم يحددون راتب الموظف بناء على المقابلة الشخصية ثم ممكن يزيد راتبه بصورة كبيرة لو كان عنده إنجازات كبيرة

وصدقني أحسن بيئة عمل على الإطلاق هي أن تكون سيد نفسك، وتعمل عمل حر لا يرأسك أحد ولا يقيمك أحد إلا تقييمك الشخصي لنفسك

Kuw_Son يقول...

أوافقك القول يا بو أحمد ..

رواتب القطاع الخاص لا تخضع للجمود القاتل مثل الوزارات .. إذا أنجزت و اشتغلت ما راح يقصرون معاك ..

و المثل يقول

اللي يتحدى ما نهده

:P

aThooB يقول...

اخوي كويت سن
هالموضوع يحبط =/
دورات كثيرة يتلقاها المدراء في الاسلوب القيادي و ادارة فرق العمل و غيرها
لكنهم يرجعون من الدورة مني و ينسون مني !
و انت كشاب طموح ودك تحقق ذاتك من خلال اتقانك للعمل و تقديمه على افضل وجه لكن في اداراتنا الحكومية يقابل هذا الطموح بالهجوم من اللي اقدم منك خوفا على انفسهم
بدل مايعينونك
يشغلون نفسهم بتحطيمك
بدل ما يطورون من انتاجيتهم في العمل

و هذا مو كل شي


بس بس خلاص ماني مكملة ببجي الحين

اشوة اني استقلت !

al7bib يقول...

أعتقد أن إن الإمتيازات هذه تنفع بالغرب وماتنفع عندنا وإن كانت مهمة وذلك لأن الإنسان المسلم يهتم بالأمور المعنوية أكثر من المادية وكذلك طبيعة الشرق بشكل عام
الإهتمام بالمنصب أولا
ثم بالإطراء
ثم بالمادة
وبصراحة موضوع حلو ومعلومة جديدة

FatmaQatar يقول...

ياااااااااا عيني والله على المتعه في العمل =" (
ان شاء الله يوم من الايام !

آآآآآآآآآآآآآآخ على الاقل ياخذون فكره وحده منهم =\

تسلم على هالموضوع والله وسع خلفيتي
عن الاعمال الناجحه الي عندهم
وشلون ينجحون اساساً XD

Kuw_Son يقول...

athoob

كلامج صحيح .. بعض العقليات القيادية في الوزارات متحجرة لدرجة ما يفرق بين الطابعة و الكمبيوتر !!

و الدورات تحصيل حاصل .. ما منها فايدة .. صرف مبالغ مالية عليهم من غير عائد !!

و إذا شاف البعض منهم شاب طموح يؤدي عمله على أكمل وجه .. يخافون على مناصبهم و يحفرون له و يكسرون مجاديفه !!

الله المستعان .. أشوة استقلتي ..

al7bib

أوافقك الرأي .. الاهتمامات عندنا مقلوبة !!

و حياك الله :)

Fatma Qatar

الله يرزقنا دوامات جذي .. بس ما نداوم ببجامات نوم !!

و هذا مثال من العديد من الأمثلة ..
يمكنك الرجوع إلى موقع المجلة اللي حاطه في الموضوع

Smile يقول...

الله يرزقنا ان شاء الله مثل ما رزقهم واحسن بعد
الوزارات اللي عندنا راح تصير جذي .. ان شاء الله .. بس متى .. لما العقليات المتحجره اللي عندنا تطله وتصير بدالها العقليات المتنوره
بعيد والا قريب الله اعلم .. خير ان شاء الله



اهم شي الكفتيريات اللي في الالوزارات تعبااااانه
مصرف الريوق كل يوم
هههههه

Kuw_Son يقول...

smile

والله صاجة .. مستوى الكفتيريا اللي في أغلب الوزارات رايح فيها .. والله حتى ببلاش ما ينبغى !!

صج مصرف ريوق كل يوم !!

الله يعين

غير معرف يقول...

"إن الله يحب إذا عمل أحدكم عملاً أن يتقنه"

عدّل الحديث

Kuw_Son يقول...

مجهول .. الله يجزاك خير على التنبيه .. تم تعديل الخطأ