الأحد، ١٥ أبريل ٢٠٠٧

ابتسامة تكفه

بعض العروس (الأفراح) أدعى إليها مع إخواني، فأذهب وأنا لا أعرف المعرس ولا أهله، فقط من باب التوجيب ولأنهم طبعوا بطاقة عليها اسمي.

وعندما أدخل القاعة وأسلم على والد المعرس والمعرس ووالد الزوجة، يكونون جميعا في حالة انقباض وكأنهم غير مرتاحين، إلا إذا دخلت شخصية كبيرة مثل نائب أو شيخ أو وزير فإنك تجد الكشرة تكاد تمزق الوجوه!

حدث هذا في عدد لا بأس به من العروس، وضايقني جقا، ولا أدري ما السبب، هل هو التوتر من همّ العرس؟ أم هو التعالي على الناس؟ أم لهم عذر لا أعلمه؟

الله أعلم

هناك ٩ تعليقات:

Kuw_Son يقول...

والله يا بو أحمد أنا العرس اللي ما أعرف فيه أحد .. من الأول ما أروح له حتى لو طابعين بوستر و تحته رعايات مالله به عليم .. شلك بعوار الراس يا خوك ..

لصار ويهه عبوس ترى على نفسه .. والله كيفه ضحك لا عند يدي ..

المنة عليه أصلا ياي عرسك ولا عرس ولدك !!

و هم ما تسلم مثل الوادم !!؟

الله المستعان

QiYaDiYa يقول...

عندنا و عندكم خير ..
عاد الحريم عندهم اكثر من جذي !!

و انا مع كلام اخوي Kuw_son

شلك بعوار الراس ..

اذا ما تعرفهم ما راح يثبتون اذا وجبتهم ولا لأ !
لا تعرفهم ولا يعرفونك !!

عاد الرياييل سهله عندهم السالفة اكثر ..
الحل .. انك تورح بس العروس الي تعرفهم ;p

غير معرف يقول...

انت مالك شغل فيهم .. توجه للعشاء وتوكل على الله..

Q8links يقول...

شكرا للسادة المشاركين

المشكلة أن الابتسامة لا تكلف شيئا

لكن ماكو الا حل اخونا بو طلال

:)

الحارث بن همّام يقول...

طويل العمر لا تلوم المعرس إذا باله ماكان وياك :) .. المعرس وقتها تلقاه مستعجل ..
جبّل عالبوفيه وانت اللي الماشي :)

kuw son .. مو جنّة آخر مرة شفتك فيها بعرس بوعجيل ؟؟ كان البوفيه يشهد لك :)

قيادية .. إذا الحريم بيجابلون بعض بالعرس الى الفجر .. أكيد بيطفشون من بعض :)

Q8LoVeR يقول...

والله اتوقع والله العالم ماجربت اصير معرس لي الحين
ولا صرت اقولكم ان شاء الله :>

بس اتوقع انه بسبت التعب وهم طول اليوم
وتلقى المعرس صغير وعازم ربعه الناشئة وخبه وحوسه فأعذرهم على الكشره واهم تعابا تلقاهم

Unknown يقول...

اول شى عزيزى افترض سلامة النية
يعنى عادة ما يكون المعرس والاهل حايسين
والمعرس اكثر واكثر
ومن الطبيعى لما تدش شخصية معروفة لازم يبتسم ما يصير شكله عابس
واهيا وضع نفسى

:)

Q8LoVeR يقول...

والله ياخي ماجربت اصير معرس لي الحين
لاجربت بعزمك ان شاء الله ونشوف شيطلع معانا ;D

Q8links يقول...

بوطللي

المعرس لاحق على اللي خبرك ياخوي، كل شي له وقته

كويت لوفر

أهم شي ما تنسانا إذا صرت معرس
:)

مشاري

صحيح لازم نحسن الظن بالريال وأهله لكن الواحد تحوشه ضيقة إذا تعنّى وراح العرس وحاس بمواقف السيرات ما يلقى مكان بسهولة وآخر شي لما يصف بالدور ويوصل للمعرس يسلم عليه بدون لا يلتفت له